Во организација на Институтот за Европска политика, на ден 15.09.2021 година беше организиран јавен дијалог на тема „Имплементација на Стратегијата за реформа на правосудниот сектор 2017 – 2022 година со Акциски план – до каде сме и што понатаму“.

На настанот, свое излагање имаше и главниот државен ревизор м-р Максим Ацевски кој се осврна на одредени слабости како во законската регулатива, така и во самото функционирање на правосудниот сектор, истакнувајќи:

„Ако сакате да имате независно судство, мора да бидат обезбедени неопходните финансиски средства, потребните материјално - кадровски ресурси и просторни услови за да може судството да ги даде очекуваните и посакувани резултати“.

Притоа, потенцираше дека доколку се погледнат одредбите од Законот за судски буџет и се стават во корелација со одредбите од Законот за буџетите, евидентна е системска неусогласеност поради тоа што Законот за буџетите не распознава судски буџет. Главниот државен ревизор укажа дека во досегашниот период, средствата кои се одвојуваат од Буџетот на државата, а се наменети за судската власт изнесуваат 0,3%, иако во Законот за судски буџет е предвидено да се издвојуваат средства во износ од 0,8% од БДП.

Во контекст на системот на доделување на договорите за јавните набавки, а кој се однесува на судската и јавно обвинителската власт, се наметна прашањето и дилемата дали воопшто постои потреба секој пооделен суд да се јавува на пазарот и да набавува одредени производи, кога во име на судската власт можат да се доделат рамковни договори со кои може да се обезбеди соодветен квалитет и цена за дадените средства.

Дијалогот се спроведува во рамки на проектот „Партнерство Јустиција: Враќање на довербата на граѓаните“, кој го спроведуваат Институтот за европска политика и Асоцијацијата Зенит, а е финансиран од Европската Унија. Проектот има за цел да придонесе за враќање на довербата на граѓаните во македонскиот правосуден сектор преку значително вклучување на граѓанското општество во суштински реформи.